నవీన భారతదేశపు నయా దళితుడ్ని నేను!

నా ధర్మం మీద మమకారం చావక

తెల్లపంచా, జంధ్య౦ వేసుకున్నానే కానీ

వాస్తవానికి  నేను ఆకలి అగ్నికీలకల్లో దహించుకుపోతూ

మృత్యుకోరలకి చిక్కి కాలే కడుపుతో విలవిల్లాడుతున్నవాడిని.

అగ్రకులం, ఆధిపత్యం, కడుపు నిండిన వాడు అని 

నన్ను పరిహసించే మాటలు  ఆ మనువు కాలం నాటివి!

  

అరుంధతి నా ఇంటి కోడలైన రోజే వరసలు కలుపుకున్న వాళ్ళం

నీ కుల కవి పదపాదానికి 

మా తాత గండపెండేరం తొడిగిన రోజునే 

బంధుత్వాన్ని  పెంచుకున్నవాళ్ళం

నీతో నే కలిసి నడవాలని నే తొందర పడ్తుంటే

నా మీద ఇంకా ఆరని ద్వేషమెందుకు?

నిష్టూర మన్పించినా నిజ౦ చెప్పక తప్పట్లేదు

గాయత్రి సాక్షిగా నాదీ చినిగిన బతుకే

కడుపు నిండని వాడెవడైనా దళితుడే! 

శాస్త్రం చెపితే శాస్త్రినని, కర్మ చేస్తే శర్మనని 

అనుకున్నానే కానీ 

అది కులభూషణం అనుకోలేదు.

కాదు అది కులమే అని గగ్గోలు పడితే 

నా పేరులో అది కూడా తెంచేసుకున్నా!

గుండెపట్టని బాధ నాకూ ఉంది

కడుపు నింపని శ్రాద్దాలు పెట్టుకుంటూ

మంత్రాన్ని నమ్ముకున్న వారసత్వం నాది.

స్టేషన్లో రైలాగ్గానే 

"అపరకర్మలు చేయిస్తారా బాబుగారూ" అంటూ 

ప్రయాణికుల్ని చుట్టుకుని

ఎన్ని అవహేళనల్ని బాధతో భరించానో 

నా జీవితాన్ని కాటేసిన తెల్లతాచుకు తెల్సు...

చిరిగిన పంచె, మాసిన తువ్వాలు ఉతుక్కోవడానికి 

మారుపంచలేని 

కులాగ్రపేదరికం నాది.  

ఈ శ్రాద్దాల రేవులో 

ఎన్ని ఉదయాలు కన్నీటిచుక్కలై ఇంకిపోయాయో..!

అవహేళన, అవమానాల చాటున బతుకీడుస్తున్న వాడెవడైనా దళితుడే.

ఖేర్లాన్జీ సామూహిక వధలో 

కారంచేడు కార్పణ్య౦లొ 

చుండూరు అమానుష సంహారంలో  

నా పాత్రేంటి అని నాతరం నిగ్గదీసి అడుగుతోంది!

రాముడు, రామచరిత వాల్మీకి మా వాడు కాదే

అయినా రాముడి కోసం రావణుడు మా వాడన్నాం

కులం ఏదయినా గుణం ప్రధానమని!

అయినాకూడా ఈ నయా దృతరాష్ట్ర కౌరవసంతానం 

కులజాడ్య కత్తులు మాపై ఝులిపించక మానలేదు. 

ఇదెక్కడి కబోది న్యాయం?

ఈ క్షమాపణ, సంజాయిషీలు  ఇక చాలు 

నా తరానికి, మలి తరాలకి వాటిని మోసే అవసరం, ఓపిక ఇక లేదు. 

నిజాలు నిక్కబొడుచుకుంటున్నాయి

స్వార్థపూరిత సృష్టితమైన వాస్తవాలు సద్దుమణిగే రోజు వస్తుంది!

గౌరవ గండపెండేరాలు

జాలి reservations

ఇవేమీ అక్కర్లేదు నాకు 

మనిషి మనిషిగా బతకడానికి కాసింత మంచితనం కావాలి

నా బాధను పంచుకుని అక్కున చేర్చుకునే వారు రావాలి.

నీతీ,నిప్పులు లాంటి కడుపుని౦పని 

మాటలు కాకుండా వాస్తవాలనెరిగిన అభిమానం కావాలి. 

వీటికై చేస్తాం పోరాటం!

ఇదే తర్వాతి తరాలకి అందించే గొప్పబహుమానం!

నిజానికి ఇప్పుడు నేనూ 

నాలాంటి ప్రతి ఆకలి జీవి దళితుడే!

ఈ జాడ్యాలు నా తరంతో అంతరించి పోవుగాక!

[Inspiration squeezed and heartened on and by Are Brahmins the Dalits of today? | The Mouths that Recited Vedas are Grieving ]