లేవండి, మేల్కొనండి(కి)...పెళ్లి రోజు శుభాకాంక్షలు (చెప్పండి)

పురాణేతిహాసాలపై శోధన కన్నా తమంతట తాముగా శోధించలేని తమ అసమర్థతని కప్పెడుతూ అసంగతంగా ప్రశ్నించడమే ఆనవాయితీగా పెట్టుక్కుని అదే అర్హతగా, హక్కుగా భావించే నేటి అత్యధికశాతపు యువతలో అతనో ఆణిముత్యం.

ఒకపక్క ఉన్నతచదువును సాగిస్తూ తగినంత సమయం లేకపోయినా వేదాలు మరియు ఉపనిషత్తులలో ఉన్న విజ్ఞాన సారాన్ని మధి౦చి వాటిని నేటి యువతకు అర్థమయ్యే వైజ్ఞానికరీతిలో చెప్పడమే గాక తర్వాత వచ్చే పిల్లకాకుల పెసినలకి తనదైన నొప్పించక...తానొప్పక శైలిలో స.ధా లు ఇస్తూ సదా సాగిపోయే అతను నిజంగానే అభినందనీయుడు.

అద్వైతంలో ద్వైతా, విశిష్టాద్వైతాలు ఎలా కలిసిపోతాయో గణిత౦ ప్రకార౦ బహుచక్కగా వివరించినా, సమాధి స్థితి, శృంగారం, గాఢనిద్ర ల మధ్య ఉన్న సారూప్యతను ముచ్చటగా చెప్పినా, ఏ విషయమైనా సమగ్రంగా నేర్చుకోవడానికి వేదాలు చెప్పిన పద్దతి గురించి సుళువుగా వివరించినా, ప్రాచీన భారత ఋషులు ఆఫర్లు అంటూ జ్ఞాననివేదన చేసినా, మన ప్రాచీన శాస్త్రజ్ఞుల(ఋషుల) విధానాన్ని విదేశీయుల కళ్ళజోళ్ళతో ఎందుకు చూడాలి? అంటూ తీపివాతల మాటున విజ్ఞానవాస్తవాన్ని అందించినా, ఆత్మహత్యలు చేసుకోవడం అవసరమా? అంటూ తనజీవితపు చేదుసంఘటనలు కలిపి ప్రశ్ని౦చినా, గురువుకు ఏమైనా కొమ్ములు మొలిచాయా? అన్నదాన్ని హాస్యంతో మేళవించి మరీ పంచుకున్నా. బ్లాగుల్లో వేడి అంశాలకు స.ధా గా వేది టపాలుగా రాసినా అది విజ్ఞాన వారసత్వ పరంపరను నిస్వార్థంతో అందించడమే పరమావధిగా పెట్టుకున్న మంచివ్యక్తి.

మరి ఇతనికి అన్నీ అమరి తీరిగ్గా కూర్చుని అవన్నీ రాస్తున్నాడంటే పప్పులో కాలేసినట్లే! అతనిమాటల్లోనే...

నావద్ద సొంతంగా కంప్యూటర్ కాని,laptop గాని లేవండి. నా స్నేహితుడి కంప్యూటర్ లో notepad పై టైపు చేసుకొని ఇంటర్నెట్ సెంటర్ కు వెళ్లి బ్లాగు పోస్టు చేయడం గాని లేకుంటే నా సెల్ నుండి మా స్నేహితుడి కంప్యూటర్ కు నెట్ కనెక్ట్ చేసి బ్లాగు వ్రాస్తుంటాను

(పై నాలుగుముక్కలు ఇతరులకి ఆదర్శంప్రాయం అవ్వాలని మాత్రమే పెట్టానని గమనించ మనవి!)

తను నేర్చుకున్న విజ్ఞానాన్ని నలుగురితో అది ఎంత కష్టమైనా పంచుకోవాలనే జిజ్ఞాసని చూడండి. ఆచరణీయం.అమోఘం.

ఇప్పటికే ఈ వ్యక్తి ఎవరో మీకు అర్థం అయిఉండాలి :). వారే లేవండి, మేల్కొనండి.. అంటూ మనల్ని టపాలతో తట్టి మరీ జ్ఞానా౦ధకారం నుంచి సదా మేలుకొలుపులు పాడే శ్రీ సురేష్ బాబు గారు.

శ్రీ సురేష్ బాబు గారి పెళ్లి రోజు నేడు. astrojoyd గారు అన్నట్లు పూర్ణపురుషుడై, ఇక నుంచి మంచానికి ఒక పక్కనుంచి దిగే అలవాటు మొదలయ్యే రోజు :).

ప్రియ బ్లాగమిత్రుడు, విజ్ఞానశీలి శ్రీ సురేష్ బాబు గారికి పెళ్లిరోజు శుభాకాంక్షలు.. వారి వైవాహిక జీవితం ఆనందోత్సాహాలతో కలకాలం సాగాలని కోరుకుందాం.

సురేష్ బాబు గారికి చిన్న మనవి :
నూతన జీవితపు సంసారంలో పడి మమ్మల్ని మేలుకొలపడం మటుకు మరిచిపోవద్దన్ని మనవి :)